International

అప్పుడే మాట మార్చేస్తున్న తాలిబాన్లు.. కశ్మీర్‌ పై కూడా స్పందిస్తారట..!

కొద్దిరోజుల కిందట తాలిబాన్ ప్రతినిధులు మాట్లాడుతూ కశ్మీర్ అంశం భారత్ అంతర్గత విషయమని.. దాన్లో తల దూర్చమని చెప్పారు. కానీ ఓ వైపు పాకిస్తాన్ నాయకులు, మరో వైపు తాలిబాన్ ప్రతినిధులు చేస్తున్న వ్యాఖ్యలు వింటూ ఉంటే.. తాలిబాన్లు-పాకిస్తాన్ నేతలు భారత్ కు వ్యతిరేకంగా పెద్ద కుట్ర పన్నుతున్నట్లు స్పష్టంగా తెలుస్తోంది. ఇప్పటికే కశ్మీర్ అంశంలో తాలిబాన్లు తమకు సహాయం చేస్తారని పాక్ అధికార పార్టీ నేతలు ఇష్టం వచ్చినట్లు చెబుతూ ఉండగా.. మరో వైపు తాలిబాన్లు కశ్మీర్‌, భారత్ లేదా మరో ఇతర దేశంలో ముస్లింల హక్కులపై మాట్లాడి తీరుతామంటూ సంచలన వ్యాఖ్యలు చేశారు. ముస్లింల సమస్యలపై స్పందించే హక్కు తమ కుందన్నారు.

కశ్మీర్‌తోపాటు మరే ఇతర ప్రాంతంలో ఉన్న ముస్లింల స్వరాన్ని వినిపించే హక్కు సాటి ముస్లింలుగా తమకుందని బీబీసీ ఉర్దూకు ఇచ్చిన ఇంటర్వ్యూలో తాలిబన్ అధికార ప్రతినిధి సుహైల్ షహీన్ స్పష్టం చేశారు. అయితే ఏ దేశానికీ వ్యతిరేకంగా ఆయుధాలను ప్రోత్సహించే విధానం తమకు లేదన్నారు. ఖతార్‌లోని దోహాలోని తాలిబాన్ రాజకీయ కార్యాలయం నుండి BBC ఉర్దూతో జూమ్ ద్వారా వీడియో ఇంటర్వ్యూలో సుహైల్ షహీన్ ఈ వ్యాఖ్యలు చేశారు. భారతదేశంలో అయినా ఇతర దేశాలలో అయినా ముస్లింల కోసం తమ స్వరాన్ని వినిపించే హక్కు తమకు ఉందని చెప్పారు. హిందువులు మరియు సిక్కుల వంటి మైనారిటీలు ఆఫ్ఘనిస్తాన్‌లో తమ మతాన్ని ఆచరించే హక్కు ఉన్నట్లే, ముస్లింలు కూడా ఇతర దేశాలలో సమాన హక్కులను కలిగి ఉండాలని ఆయన అన్నారు. ఇతర దేశాలలో ముస్లింలు వివక్షకు గురైతే, అలాంటి ముస్లింల కోసం తాలిబాన్ తన స్వరాన్ని పెంచుతుంది. “మేము మా స్వరాన్ని పెంచుతాము ముస్లింలు మీ స్వంత ప్రజలు, మీ స్వంత పౌరులు అని చెబుతాము. మీ చట్టాల ప్రకారం వారికి సమాన హక్కులు ఉంటాయి” అని ఆయా దేశాలకు తెలియజేస్తామని అన్నారు.

తాలిబాన్ ఏ దేశానికి వ్యతిరేకంగా ఆయుధాలను ఎత్తదని తెలిపారు. ఇతర దేశాలకు వ్యతిరేకంగా సైనిక కార్యకలాపాలను నిర్వహించమని అన్నారు. అమెరికాతో కుదుర్చుకున్న దోహా ఒప్పందం ప్రకారం, ఆఫ్ఘనిస్తాన్ నుండి ఏ దేశంపై దాడి చేయడానికి తాలిబాన్ ఏ సమూహాన్ని లేదా సంస్థను అనుమతించదని ఆయన అన్నారు. ఆఫ్ఘనిస్తాన్ ఇస్లామిక్ ఎమిరేట్‌లో భాగమని.. హక్కానీ నెట్‌వర్క్ అనే ప్రత్యేక సమూహం లేదని చెప్పారు. తాలిబాన్ మరియు హక్కానీ నెట్‌వర్క్ వేర్వేరు సంస్థలు అని యుఎస్ స్టేట్ డిపార్ట్‌మెంట్ చెప్పిన కొద్ది రోజుల తర్వాత ఈ వ్యాఖ్యలు రావడం ప్రాధాన్యత సంతరించుకుంది. హక్కానీ నెట్‌వర్క్ నాయకుడు సిరాజుద్దీన్ హక్కానీ తాలిబాన్ డిప్యూటీ చీఫ్ అయ్యాడు. తాలిబాన్ ద్వారా కాబూల్ నగరం యొక్క భద్రతా బాధ్యత ఈ నెట్‌వర్క్‌కు ఇవ్వబడింది. ముహమ్మద్ సుహైల్ షహీన్ తాలిబాన్ యొక్క చర్చల బృందంలో సభ్యుడు మరియు ఇస్లామిక్ ఎమిరేట్స్ కోసం అంతర్జాతీయ మీడియా అధికారిక ప్రతినిధిగా ఉన్నారు. మునుపటి తాలిబాన్ పాలనలో కాబూల్ టైమ్స్ సంపాదకుడిగా వ్యవహరించారు. తరువాత పాకిస్తాన్‌లోని ఆఫ్ఘన్ రాయబార కార్యాలయానికి డిప్యూటీ అంబాసిడర్‌గా నియమించబడ్డారు.

కశ్మీర్ విషయంలో తాలిబాన్లు సహకరిస్తారంటూ పాక్ నేతల వ్యాఖ్యలు:

ఇమ్రాన్ ఖాన్ నేతృత్వంలోని ప్రభుత్వం తాలిబానీ నాయకులకు సంరక్షణగా ఉందని పాకిస్థాన్ మంత్రి షేక్ రషీద్ ఒక టీవీ కార్యక్రమంలో ఒప్పుకున్నారు. “మేము తాలిబాన్ నాయకుల సంరక్షకులు. మేము వారిని చాలాకాలం చూసుకున్నాము. వారు పాకిస్తాన్‌లో ఆశ్రయం, విద్య మరియు నివాసాన్ని పొందారు. మేము వారి కోసం ప్రతిదీ చేశాము” అని రషీద్ బహిరంగంగా ప్రకటించారు. పాక్ అధికార పార్టీ పాకిస్తాన్ టెహ్రీక్-ఎ-ఇన్సాఫ్ (పీటీఐ) పార్టీ నేత నీలం ఇర్షాద్ షేక్ లైవ్ షోలో సంచలన వ్యాఖ్యలు చేశారు. ప్రస్తుతం తాము తాలిబాన్లకు మద్దతు ఇస్తున్నామని.. త్వరలో తాలిబాన్లు కశ్మీర్ విషయంలో తమకు సహాయం చేస్తారని నీలం ఇర్షాద్ షేక్ చెప్పుకొచ్చారు. కశ్మీర్ విషయంలో మనకు సాయం చేసేందుకు తాలిబాన్లు సుముఖంగా ఉన్నారని ఆమె అన్నారు. తాలిబాన్లు అవమానకరమైన ప్రవర్తన ఎదుర్కొన్నారని, అందుకే తమకు సాయం చేసేందుకు ముందుకొస్తున్నారని స్పష్టంచేశారు.. తాలిబాన్లు తమతోనే ఉన్నారని.. కశ్మీర్ ను తమకు ఇప్పిస్తారని.. పాకిస్తాన్ తాలిబాన్లకు ఎంతగానో సహాయం చేసింది కాబట్టి.. కశ్మీర్ విషయంలో వాళ్లు కూడా తమకు సహాయం చేస్తారని ఆమె తెలిపింది.

Related Articles

Leave a Reply

Your email address will not be published. Required fields are marked *

nineteen − 11 =

Back to top button