ఎమ్మెల్సీ కవితపై వివాదాస్పద వ్యాఖ్యలకు సంబంధించి బీజేపీ రాష్ట్ర అధ్యక్షుడు బండి సంజయ్ రాష్ట్ర మహిళా కమిషన్ ముందు హాజరయ్యారు. కవితపై చేసిన వ్యాఖ్యలపై మహిళా కమిషన్ కు బండి సంజయ్ వివరణ ఇచ్చారు. ఢిల్లీ లిక్కర్ స్కామ్ లో బీఆర్ఎస్ ఎమ్మెల్సీ కవితను ఈడీ అరెస్ట్ చేయకపోతే ముద్దు పెట్టుకుంటుందా? అని తాను అన్న దాంట్లో తప్పేమీ లేదని బండి సంజయ్ అన్నారు. కవిత అరెస్ట్ ను ప్రస్తావించే క్రమంలోనే ఇలా అన్నానని, ఇది మన దగ్గర వాడుకలో ఉన్న సామెతేనని చెప్పారు.
తాను తప్పు చేయలేదు కాబట్టే కమిషన్ ముందు హాజరయ్యానని తెలిపారు. లిక్కర్ స్కామ్ లో కవిత వికెట్ పడిపోయిందని, మరి కొందరు బీఆర్ఎస్ నేతలు త్వరలోనే క్లీన్ బౌల్డ్ అవుతారని చెప్పారు. లిక్కర్ స్కామ్ లో ఉన్న వారిని విడిచిపెట్టే ప్రసక్తే లేదని అన్నారు. అంబర్ పేటలో కుక్క కాటుకు బాలుడు మృతి చెందడం, సికింద్రాబాద్ లో అగ్నిప్రమాదం వంటి వాటికి కేటీఆరే కారణమని బండి సంజయ్ ఆరోపించారు.
