More

    నేపాల్ ను వణికించిన భూకంపం.. ఢిల్లీలో కూడా ప్రకంపనలు

    బుధవారం ఉదయం నేపాల్‌లో 6.6 తీవ్రతతో భూకంపం సంభవించింది. ఇప్పటి వరకూ అందిన సమాచారం ప్రకారం ఆరుగురు వ్యక్తులు మరణించారని మీడియా నివేదించింది. తెల్లవారుజామున 2.12 గంటలకు నేపాల్‌లోని దోటీ జిల్లాలో భూకంపం కేంద్రంగా నమోదైంది. ఒక ఇల్లు కూలిపోవడంతో ఆరుగురు మరణించారు. యూరోపియన్-మెడిటరేనియన్ సీస్మోలాజికల్ సెంటర్ (EMSC) ఇంతకుముందు భూకంప తీవ్రత 5.6గా ఉందని అంచనా వేసింది. పొరుగున ఉన్న ఉత్తరప్రదేశ్‌లోని పిలిభిత్‌కు ఈశాన్యంగా 158 కిలోమీటర్ల దూరంలో భూకంపం కేంద్రీకృతమైందని మరియు 10 కిలోమీటర్ల లోతులో సంభవించిందని EMSC తెలిపింది. భూకంపం తర్వాత భారతదేశ రాజధాని న్యూఢిల్లీ, పరిసర ప్రాంతాలలో కూడా ప్రకంపనలు సంభవించాయి.

    నేపాల్‌లో గత అర్ధరాత్రి దాటిన తర్వాత భారీ భూకంపం సంభవించింది. గురుగ్రామ్, నోయిడాలలో పది సెకన్లపాటు ప్రకంపనలు కనిపించాయి. దీంతో భయపడిన ప్రజలు ఇళ్ల నుంచి బయటకు పరుగులు తీశారు. ఈ భూకంప తీవ్రత రిక్టర్ స్కేలుపై 6.3గా నమోదైంది. భూమికి 10 కిలోమీటర్ల లోతున భూకంప కేంద్రం ఉన్నట్టు నేపాల్ జాతీయ సిస్మోలజీ కేంద్రం ప్రకటించింది. నేపాల్‌లో గంటల వ్యవధిలోనే రెండుసార్లు భూమి కంపించింది. గత రాత్రి 8.52 గంటల సమయంలో 4.9 తీవ్రతతో భూకంపం సంభవించగా, అర్ధరాత్రి దాటిన తర్వాత మరింత తీవ్రతతో భూమి కంపించింది.

    నేపాల్‌లో అక్టోబరు 19న కాఠ్మండులో 5.1 తీవ్రతతో భూకంపం రాగా, జులై 31న 6.0 తీవ్రతతో భూమి కంపించింది. 2015లో 7.8 తీవ్రతతో సంభవించిన భూకంపం నేపాల్ లో పెను విధ్వంసం సృష్టించింది. ఈ భూకంపం కారణంగా దాదాపు 8,964 మంది ప్రాణాలు కోల్పోయారు.

    Trending Stories

    Related Stories