National

సమాజ్ వాదీ పార్టీ ర్యాలీలో ‘పాకిస్తాన్ జిందాబాద్’ అంటూ నినాదాలు

గురువారం ఆగ్రాలో సమాజ్ వాదీ పార్టీ కార్యకర్తలు నిర్వహించిన ర్యాలీలో పాకిస్తాన్ అనుకూల నినాదాలు చేశారు. సమాజ్ వాదీ పార్టీ పెరుగుతున్న ఇంధన ధరలకు వ్యతిరేకంగా రాష్ట్ర వ్యాప్తంగా నిరసనలు నిర్వహించింది. అంతేకాకుండా ఉత్తరప్రదేశ్ రాష్ట్రంలో ఇటీవల ముగిసిన పంచాయతీ ఎన్నికలలో పెద్ద ఎత్తున మోసం జరిగిందని ఆరోపిస్తూ నిరసన ప్రదర్శనలు నిర్వహించారు. అయితే సమాజ్ వాదీ పార్టీ ర్యాలీకి హాజరైన కార్యకర్తలు ‘పాకిస్తాన్ జిందాబాద్’ అని అంటున్న వీడియో వైరల్ అయ్యింది. బీజేపీ ప్రభుత్వానికి వ్యతిరేకంగా నిరసనల తరువాత సమాజ్ వాదీ పార్టీ కార్యకర్తలు తిరిగి వస్తున్నప్పుడు ఈ నినాదాలు లేవనెత్తారు. వీడియోలో ఎర్ర చొక్కా ధరించిన వ్యక్తి “పాకిస్తాన్ జిందాబాద్” నినాదాలు చేయడం వినవచ్చు. ఈ సంఘటన చోటు చేసుకున్న ర్యాలీకి సమాజ్ వాదీ పార్టీ ఆగ్రా జిల్లా అధ్యక్షుడు వాజిద్ నిసార్ కూడా హాజరయ్యారు.

ఈ సంఘటన యొక్క వీడియో వైరల్ కావడంతో ర్యాలీలో పాకిస్తాన్ అనుకూల నినాదాలు వచ్చాయని నిసార్ అంగీకరించారు. ఏదేమైనా, కొంతమంది బయటి వ్యక్తులు పార్టీ యొక్క ఇమేజ్ ను కించపరిచేలా అలాంటి అభ్యంతరకరమైన నినాదాలు చేశారని ఆయన చెప్పుకొచ్చారు. సమాజ్ వాదీ పార్టీ నాయకుడు కూడా తాను పోలీసులకు లిఖితపూర్వక ఫిర్యాదు చేశానని, నిందితులపై కఠినమైన చట్టపరమైన చర్యలు తీసుకోవాలని కోరారు.

పంకజ్ సింగ్ అనే వ్యక్తి నినాదాలు చేసినట్లు ఆరోపణలు వస్తున్నట్లు సమాచారం. ఈ ఆరోపణలను పంకజ్ సింగ్ ఖండించారు. ములాయం సింగ్, అఖిలేష్ యాదవ్, సమాజ్ వాదీ పార్టీలకు మద్దతుగా తాను నినాదాలు మాత్రమే చేశానని చెప్పాడు. “నేను ఠాకూర్. నేను పాకిస్తాన్ జిందాబాద్ నినాదాలను ఎందుకు లేవనెత్తుతాను? ” అని సింగ్ అడిగాడు. ఉత్తర ప్రదేశ్ పోలీసులు ఈ సంఘటనను గుర్తించి దర్యాప్తు ప్రారంభించారు.

ఈ నినాదాలపై బీజేపీ-హిందుత్వ సంస్థల ఆగ్రహం

ఈ సంఘటన తరువాత, బీజేపీ, వివిధ హిందూ సంస్థలు అఖిలేష్ యాదవ్ నేతృత్వంలోని సమాజ్ వాదీ పార్టీపై తీవ్ర విమర్శలు చేశారు. సమాజ్ వాదీ పార్టీ పాకిస్తాన్ నుండి పనిచేస్తుందా అని ప్రశ్నలు వచ్చాయి. “ఈ రోజు ఆగ్రాలో, సమాజ్ వాదీ పార్టీ నగర అధ్యక్షుడు వాజిద్ నిసార్ నాయకత్వంలో బీజేపీకి వ్యతిరేకంగా ర్యాలీలో పాకిస్తాన్ జిందాబాద్ నినాదాలు చేశారు. సమాజ్ వాదీ పార్టీ పాకిస్తాన్ నుండి పనిచేస్తుందా? ” బీజేపీ ఒక ట్వీట్‌లో ప్రశ్నించింది.

హిందూ జాగరణ్ మంచ్ కూడా ఈ సంఘటనను ఖండించింది. సమాజ్ వాదీ పార్టీ దేశ ప్రయోజనాలకు వ్యతిరేకంగా కార్యకలాపాలు నిర్వహిస్తోందని.. ఇలాంటి భారత్ వ్యతిరేక నినాదాలు చేసినందుకు సమాజ్ వాదీ పార్టీ నాయకులపై దేశద్రోహ కేసులు పెట్టాలని కోరారు.

సమాజ్ వాదీ పార్టీ కార్యకర్తలు పాకిస్తాన్ అనుకూల నినాదాలు లేవనెత్తిన కొద్ది రోజుల కిందటే ఉత్తరప్రదేశ్ మాజీ ముఖ్యమంత్రి, సమాజ్ వాదీ పార్టీ చీఫ్ అఖిలేష్ యాదవ్ అల్ ఖైదా అనుమానితులపై రాష్ట్ర పోలీసుల చర్యకు వ్యతిరేకంగా మాట్లాడారు. కాకోరి నుండి ఇద్దరు అల్-ఖైదా ఉగ్రవాద నిందితుల అరెస్టులపై స్పందించిన ఎస్పీ అధినేత, “ఉత్తర ప్రదేశ్ పోలీసులు మరియు ముఖ్యమంత్రి యోగి ఆదిత్యనాథ్ నేతృత్వంలోని బీజేపీ ప్రభుత్వం చర్యలను నేను నమ్మలేను” అని అన్నారు. దీనిపై తీవ్ర వ్యతిరేకత వచ్చింది.

Related Articles

Leave a Reply

Your email address will not be published. Required fields are marked *

18 + 12 =

Back to top button