మైనారిటీలైన హిందువులపై బంగ్లాదేశ్ లో ఇంకా దాడులు కొనసాగుతూనే ఉన్నాయి. ఎన్నో ప్రాంతాలలోని దుర్గా మండపాల మీద మొదలైన దాడులు.. ఇస్కాన్ టెంపుల్ మీద దాడి చేసే దాకా వెళ్లిపోయాయి. బంగ్లాదేశ్ లో హిందువులకు ఏ మాత్రం రక్షణ లేదనే విషయం మరోసారి కన్ఫర్మ్ అయింది. నౌఖాలీ జిల్లాలో ఇస్కాన్ దేవాల‌యంపై దుండగులు దాడి చేసి విధ్వంసానికి దిగారు. భ‌క్తుల‌పైనా దాడి చేశారు. గాయ‌ప‌డిన భక్తుల పరిస్థితి విషమంగా ఉందని తెలిపారు. బంగ్లాదేశ్‌లోని హిందువులకు రక్షణ కల్పించాలని ప్రభుత్వాన్ని కోరుతున్నారు.
దసరా సందర్భంగా ఇస్కాన్ ఆలయం, భక్తులపై 200 మందికి పైగా దుండగులు దాడి చేశారు. హింసాత్మక దాడిలో 3 మంది భక్తులు మరణించగా, 30 మందికి పైగా గాయపడ్డారు. 144 సెక్షన్ విధించినా చౌముహాని ప్రాంతంలో శుక్రవారం నాడు ఈ ఘటన జరిగింది. “దాడి చేసిన వారు మెజారిటీ వర్గానికి చెందిన వాళ్లు.. గూండాల్లా ప్రవర్తించారు. ముగ్గురు భక్తులు మరణించారు. భవిష్యత్తులో ఇటువంటి సంఘటనలు జరగకుండా బంగ్లాదేశ్ ప్రభుత్వం చర్యలు తీసుకోవాలి” అని ఇస్కాన్ నేషనల్ కమ్యూనికేషన్ డైరెక్టర్ వ్రజేంద్ర నందన్ దాస్ మీడియాకి చెప్పారు. మరణించిన వారిలో ఒకరు శ్రీ పార్థ దాస్ (25) గా గుర్తించారు, అతను దుండగుల చేతిలో దారుణంగా చంపబడ్డాడు. అతని మృతదేహం ఆలయం పక్కన ఉన్న చెరువులో కనుగొనబడింది. కొమిల్లా పట్టణంలోని ననువర్ దిగి సరస్సు సమీపంలోని దుర్గా పూజ పండల్ వద్ద ఖురాన్ ను అపవిత్రం చేసినట్లు సోషల్ మీడియాలో వార్తలు వ్యాపించడంతో హింస చెలరేగింది.
ఆలయానికి నష్టం వాటిల్లిందని, ఒక భక్తుడి పరిస్థితి విషమంగా ఉందని ఇస్కాన్ దేవాలయం ట్విట్టర్‌లో ఒక ప్రకటన విడుదల చేసింది. త‌మ దేవాల‌యంపై దుండగులు దాడి చేసి విధ్వంసానికి దిగారు. భ‌క్తుల‌పైనా దాడి చేశారు. గాయ‌ప‌డిన ఒక భక్తుడి పరిస్థితి విషమంగా ఉందని తెలిపారు. బంగ్లాదేశ్‌లోని హిందువులకు రక్షణ కల్పించాలని ప్రభుత్వాన్ని కోరారు. “ఇస్కాన్ దేవాలయం మరియు భక్తులపై ఒక గుంపు హింసాత్మకంగా దాడి చేసింది. దేవాలయం చాలా భాగం దెబ్బతింది మరియు భక్తుడి పరిస్థితి విషమంగా ఉంది. హిందువులందరికీ భద్రత కల్పించాలని మరియు నేరస్థులను శిక్షించాలని బంగ్లాదేశ్ ప్రభుత్వాన్ని మేము కోరుతున్నాము. “అని ఇస్కాన్ ట్వీట్‌లో తెలిపింది.
బంగ్లాదేశ్ ప్రధాన మంత్రి షేక్ హసీనా హిందూ దేవాలయాలపై దాడి చేసిన వారిని శిక్షిస్తామని హామీ ఇచ్చిన కొన్ని గంటల తర్వాత ఈ దాడి జరిగింది. గురువారం నాడు దుర్గా పూజ వేడుకల సందర్భంగా కొంతమంది గుర్తు తెలియని దుండగులు హిందూ దేవాలయాలను ధ్వంసం చేశారు. ఆ తర్వాత జరిగిన అల్లర్లలో ముగ్గురు మరణించారు మరియు అనేక మంది గాయపడ్డారు. ఈ ఘటనలపై స్పందించిన భారత విదేశీ వ్యవహారాల మంత్రిత్వ శాఖ (MEA).. బంగ్లాదేశ్ ప్రభుత్వం తక్షణమే స్పందించి పరిస్థితి అదుపు చేయాలని కోరింది.
