జార్ఖండ్‌ బీజేపీ మాజీ ఎమ్మెల్యే గురుచరణ్ నాయక్ మావోయిస్టుల దాడి నుంచి తృటిలో తప్పించుకున్నారు. ఆయన మంగళవారం పశ్చిమ సింగ్‌భూమ్ జిల్లాలోని జినరువాన్ గ్రామంలో నిర్వహించిన ఫుట్‌బాల్‌ పోటీలకు ముఖ్య అతిథిగా హాజరయ్యారు. ఈ క్రమంలో ఆయనపై ఒక్కసారిగా మావోయిస్టులు దాడికిదిగారు అప్రమత్తమైన ముగ్గురు బాడీగార్డులు ఎమ్మెల్యేను రక్షించారు. మావోయిస్టులు గొంతు కోసి ఆయన ఇద్దరు అంగరక్షకులు శంకర్ నాయక్, ఠాకూర్ హెంబ్రోమ్ ప్రాణాలు తీశారు. మరో ఇద్దరిని కాపాడేందుకు మావోయిస్టులతో పోరాడి అక్కడి నుంచి మూడో అంగరక్షకుడు రామ్‌కుమార్‌ తుడు ప్రాణాలు కాపాడుకున్నాడు. మాజీ ఎమ్మెల్యే ఈ కార్యక్రమానికి హాజరైన సమయంలో జనంలోకి వచ్చేసి తన ప్రాణాలను కాపాడుకున్నారు. ముగ్గురు అంగరక్షకుల నుంచి ఒక ఏకే 47, రెండు ఇన్సాస్ రైఫిళ్లను కూడా మావోయిస్టులు దోచుకున్నారు. ఘటన జరిగిన రెండున్నర గంటల తర్వాత ఘటనాస్థలికి చేరుకున్న పోలీసు బృందం చనిపోయిన ఒక బాడీగార్డు మృతదేహాన్ని స్వాధీనం చేసుకుంది. రెండో మృతదేహాన్ని వెలికితీశారా లేదా అనే విషయంపై క్లారిటీ లేదు.
ఈ ఘటనపై డీజీపీ స్పందిస్తూ.. మాజీ ఎమ్మెల్యే ఫుట్‌బాల్‌ కార్యక్రమానికి హాజరవుతున్నట్లు ముందస్తు సమాచారం అందించలేదని తెలిపారు. గురుచరణ్ నాయక్ గతంలో మనోహర్‌పూర్‌ నియోజకవర్గ ఎమ్మెల్యేగా సేవలు అందించారు. ఘటనా స్థలంలో అదనపు బలగాలను మోహరించామని, ఇంకో మృతదేహాన్ని వెలికితీయాల్సి ఉందని డీజీపీ తెలిపారు. జిల్లా కేంద్రానికి 60 కిలోమీటర్ల దూరంలోని గోయిల్‌కెర పోలీస్ స్టేషన్ పరిధిలోని జిలౌరా గ్రామంలోని ప్రాజెక్ట్‌ హైస్కూల్‌లో ఈ ఘటన చోటుచేసుకుంది. మనోహర్‌పూర్‌ మాజీ ఎమ్మెల్యే గురుచరణ్‌నాయక్‌ ప్రాజెక్ట్‌ హైస్కూల్‌ క్యాంపస్‌లో నిర్వహించిన రెండు రోజుల ఫుట్‌బాల్‌ పోటీలకు సంబంధించి బహుమతి పంపిణీ కార్యక్రమానికి హాజరయ్యేందుకు అక్కడికి వెళ్లారు. పాఠశాల వ్యవస్థాపక దినోత్సవం సందర్భంగా ఫుట్‌బాల్‌ మ్యాచ్‌ లను నిర్వహించారు.
నక్సల్ కమాండర్ మొచ్చు సాయుధ దళానికి చెందిన సుమారు 100 మంది నక్సల్స్ గుంపులో కలిసిపోయి మైదానంలో వ్యూహాత్మక ప్రదేశాల్లో పొజిషన్లు తీసుకున్నారు. సాయంత్రం 5.15 గంటలకు కార్యక్రమం ముగిసి, నాయక్ తన వాహనం వద్దకు రాగానే, మావోయిస్టులు కాల్పులు జరిపి అంగరక్షకులపై దాడి చేశారు. ఇద్దరు జవాన్ల గొంతు కోశారు. వారిని కాపాడే ప్రయత్నంలో కొందరు గాయపడ్డాడు. నాయక్ నివాసం సోనువా పోలీస్ స్టేషన్ పరిధిలోని తునియా గ్రామంలో ఉంది. ఘటన జరిగిన ప్రాంతం నుండి కేవలం ఒకటిన్నర కిలోమీటర్ల దూరంలో ఉంది. ఎలాగోలా సురక్షితంగా తన నివాసానికి చేరుకున్నాడు, అక్కడ నుండి అతను పోలీసులకు వెళ్లి సంఘటన గురించి చెప్పాడు.
గురుచరణ్ నాయక్ విలేకరులతో మాట్లాడుతూ “మేము ప్రతి సంవత్సరం మాదిరిగానే ప్లేగ్రౌండ్‌కి వచ్చాము. అవార్డులు పంపిణీ చేయబడ్డాయి. సాయంత్రం 5.15 గంటలకు నేను నా వాహనం ఎక్కేందుకు సిద్ధంగా ఉన్నాను, దాదాపు 20-30 మంది మావోయిస్టులు మాపై దాడి చేశారు. ఆ తర్వాత ఎలాగోలా తప్పించుకోగలిగాను” అని తెలిపాడు.
