ఆఫ్ఘనిస్తాన్ కు భారత్ మరో సాయం చేసింది. భారతదేశం శనివారం నాడు మన దేశంలో తయారు చేసిన కోవిడ్-19 వ్యాక్సిన్ ‘కోవాక్సిన్‌’ను ఆఫ్ఘనిస్తాన్కు పంపింది. మొత్తం 5 లక్షల డోస్‌లను ఆఫ్ఘనిస్తాన్కు పంపింది. భారతదేశం మానవతా సహాయం కింద ఆఫ్ఘనిస్తాన్కు 500,000 డోస్‌ల COVID వ్యాక్సిన్ (COVAXIN)తో కూడిన తదుపరి బ్యాచ్‌ను సరఫరా చేసింది. కాబూల్‌లోని ఇందిరాగాంధీ ఆసుపత్రికి అప్పగించినట్లు విదేశాంగ మంత్రిత్వ శాఖ తెలిపింది. రాబోయే వారాల్లో మరో 500,000 డోస్‌ల వ్యాక్సిన్లు సరఫరా చేయనున్నారు.
ఆహార ధాన్యాలు, ఒక మిలియన్ డోస్ కోవిడ్ వ్యాక్సిన్లు, ప్రాణాలను రక్షించే మందులను మానవతా సహాయం కింద ఆఫ్ఘన్ ప్రజలకు అందించడానికి భారత ప్రభుత్వం కట్టుబడి ఉందని విదేశాంగ మంత్రిత్వ శాఖ మరోసారి తెలిపింది. గత నెల ప్రారంభంలో, ప్రపంచ ఆరోగ్య సంస్థ (WHO) ద్వారా భారతదేశం ఆఫ్ఘనిస్తాన్కు వైద్య సహాయాన్ని అందించింది. “రాబోయే వారాల్లో, మేము గోధుమల సరఫరా, మిగిలిన వైద్య సహాయాన్ని చేపట్టనున్నాము. ఈ విషయంలో, రవాణాకు సంబంధించిన విధివిధానాలను ఖరారు చేయడానికి మేము UN ఏజెన్సీలు ఇతరులతో సంప్రదింపులు జరుపుతున్నాము, ”అని విదేశాంగ మంత్రిత్వ శాఖ తెలిపింది.
ఒమిక్రాన్ ప్రపంచ దేశాలను ఇబ్బంది పెడుతూ ఉంటే.. ఆఫ్ఘనిస్తాన్‌లో ఒమిక్రాన్‌ను గుర్తించే పరికరాలు కూడా లేవు. వేగంగా వ్యాప్తి చెందుతున్న కొత్త కోవిడ్ -19 వేరియంట్ కోసం పరీక్షా యంత్రాలను అందించమని ప్రపంచ ఆరోగ్య సంస్థ (డబ్ల్యూహెచ్‌ఓ)ని కోరినట్లు ఆఫ్ఘన్ తాలిబాన్ ప్రభుత్వం తెలిపింది. “ఇప్పుడు మా వద్ద ఉన్న PCR యంత్రాల ద్వారా ఒమిక్రాన్ ను గుర్తించలేము, దీనికి మరింత అభివృద్ధి చెందిన యంత్రాలు అవసరం. ఇప్పటికే మేము WHOని సంప్రదించాము. జనవరి 2022 చివరి నాటికి ఈ యంత్రాలను మాకు అందజేస్తామని వారు వాగ్దానం చేసారు,” అని జావేద్ హాజర్, ప్రజారోగ్య మంత్రిత్వ శాఖ (MOPH) తెలిపారు.
