పాక్ ప్రధాని ఇమ్రాన్ ఖాన్ కు రాజకీయంగా షాకుల మీద షాకులు తగులుతూ ఉండగా ఇప్పుడు అతడి కుటుంబానికి సన్నిహితంగా ఉన్న వాళ్లు పాకిస్తాన్ ను వదిలిపెట్టి వెళుతూ ఉండడంతో ఇమ్రాన్ ఖాన్ కు మరిన్ని చిక్కులు మొదలయ్యాయి. ఇమ్రాన్ ఖాన్ భార్య బుష్రా బీబీ సన్నిహితురాలు ఫరా ఖాన్ పాకిస్తాన్ ను విడిచి వెళ్లిపోయిందని స్థానిక మీడియా పేర్కొంది. ఇమ్రాన్ కుటుంబంతో ఉన్న సాన్నిహిత్యాన్ని అడ్డుపెట్టుకుని ఫరా ఖాన్ భారీ మోసాలకు పాల్పడడమే కాకుండా.. పెద్ద మొత్తంలో డబ్బులు వసూలు చేశారని మీడియా ఆరోపించింది. ఫరా ఖాన్ 32 మిలియన్ డాలర్ల కుంభకోణానికి పాల్పడ్డారని పాక్ విపక్షాలు విమర్శిస్తూ ఉన్నారు.
పాక్ ప్రధాని ఇమ్రాన్ ఖాన్ అధికారాన్ని చేజిక్కించుకోవాలని ప్రయత్నిస్తూ ఉండగా.. కొత్త ప్రభుత్వం ఏర్పాటైతే ప్రతీకారం తీర్చుకుంటామనే భయంతో ఆయన సన్నిహితులు విదేశాలకు పారిపోవడం ప్రారంభించారు. ఫరా ఖాన్ భర్త అహ్సన్ జమీల్ గుజ్జార్ ఇప్పటికే అమెరికా వెళ్లిపోయారు. ఫరా ఖాన్ ఆదివారం దుబాయ్‌కు వెళ్లిపోయిందని ఎక్స్‌ప్రెస్ ట్రిబ్యూన్ వార్తాపత్రిక నివేదించింది. ఇమ్రాన్ ఖాన్‌పై అవిశ్వాస తీర్మానాన్ని నేషనల్ అసెంబ్లీ డిప్యూటీ స్పీకర్ తిరస్కరించిన తర్వాత పాకిస్థాన్‌లో నెలకొన్న రాజకీయ గందరగోళం మధ్య ఈ పరిణామం చోటు చేసుకుంది.
పాకిస్థాన్ ముస్లిం లీగ్ (ఎన్) వైస్ ప్రెసిడెంట్, మాజీ ప్రధాని నవాజ్ షరీఫ్ కుమార్తె మరియం నవాజ్ మాట్లాడుతూ ఇమ్రాన్ ఖాన్ మరియు అతని భార్య బుష్రా బీబీ ఆదేశాల మేరకు ఫరా భారీ అవినీతికి పాల్పడ్డారని పేర్కొన్నారు. మరియమ్ నవాజ్, ఇమ్రాన్ ఖాన్ అధికారానికి దూరంగా ఉన్న తర్వాత ఈ దోపిడీ బట్టబయలు అవుతుందనే భయంతోనే పారిపోయారని అన్నారు. బదిలీలు, పోస్టింగ్‌లలో ఫరా తన పలుకుబడిని ఉపయోగించి బిలియన్ల రూపాయలను సంపాదించారని ఇటీవలే తొలగించబడిన పంజాబ్ గవర్నర్ చౌదరి సర్వర్, ఇమ్రాన్ ఖాన్ పాత స్నేహితుడు మరియు పార్టీ ఫైనాన్సర్ అలీమ్ ఖాన్ కూడా ఆరోపించారు. ఫరా ఖాన్, ఆమె భర్త దుబాయ్‌కి పారిపోవడమే కాకుండా, ఇమ్రాన్ ఖాన్ సన్నిహితులు దేశం విడిచి వెళ్లాలని ప్లాన్ చేసినట్లు కూడా నివేదికలు ఉన్నాయి.
