National

అస్సాం-మిజోరాం సరిహద్దు సమస్యకు ఇలా చెక్

అస్సాం-మిజోరాం సరిహద్దు సమస్యకు చెక్ పెట్టే దిశగా ప్రభుత్వం అడుగులు ముందుకు వేస్తోంది. అస్సాం, మిజోరం సరిహద్దుల్లో జూలై 26వ తేదీన జరిగిన ఘర్షణల్లో ఐదుగురు అస్సాంకు చెందిన పోలీసులు ప్రాణాలు కోల్పోయారు. 60 మందికి పైగా గాయపడ్డారు. బ్రిటీష్ కాలం నాటి సరిహద్దు వివాదం ఒక్కసారిగా బయటకు రావడంతో ఈ సమస్యను వీలైనంత త్వరగా పరిష్కరించాలని కేంద్ర ప్రభుత్వం భావిస్తోంది. అందుకే ఈ వివాదాలకు శాశ్వతంగా చెక్‌ పెట్టేందుకు ఆయా రాష్ట్రాల హద్దులను శాటిలైట్‌ ఇమేజింగ్‌ సాయంతో నిర్ణయించనుంది.

నార్త్‌ ఈస్టర్న్‌ స్పేస్‌ అప్లికేషన్‌ సెంటర్‌(ఎన్‌ఈఎస్‌ఏసీ, నెశాక్‌) కు ఈ బాధ్యతలను ఇచ్చినట్లు కేంద్ర ప్రభుత్వంతెలిపింది. రాష్ట్రాల సరిహద్దులను శాటిలైట్‌ ఇమేజింగ్‌ ద్వారా శాస్త్రీయంగా ఖరారు చేయాలన్న ఆలోచనను హోంమంత్రి అమిత్‌ షా కొన్ని నెలల క్రితం తెరపైకి తెచ్చారని అన్నారు. శాస్త్రీయంగా చేపట్టే సరిహద్దుల విభజన కచ్చితత్వంతో ఉంటుందనీ, దీని ఆధారంగా చూపే పరిష్కారం రాష్ట్రాలకు ఎక్కువ ఆమోదయోగ్యంగా ఉంటుందని నార్త్‌ ఈస్టర్న్‌ స్పేస్‌ అప్లికేషన్‌ సెంటర్‌ అధికారులు వెల్లడించారు. నెశాక్‌ నుంచి అందే శాటిలైట్‌ మ్యాపింగ్‌ ప్రకారం ఈశాన్య రాష్ట్రాల సరిహద్దుల నిర్ణయం జరుగుతుందనీ, ఈ సమస్యకు శాశ్వతంగా పరిష్కారం లభిస్తుందని ప్రభుత్వం భావిస్తోంది.

సమస్య ఎప్పటిదంటే:

ఇరు రాష్ట్రాల మధ్య వివాదానికి బ్రిటీష్ కాలంలోనే బీజం పడిది. దేశానికి స్వాతంత్ర్యం వచ్చిన తర్వాత.. ఈశాన్య భారతంలో క్రమంగా రాష్ట్రాలను ఏర్పాటు చేయడం జరిగింది. ప్రస్తుత మిజోరాం రాష్ట్రం ఒకప్పుడు అసోం రాష్ట్రంలో ఒక జిల్లాగా వుండేది. ఆ తర్వాత ప్రత్యేక రాష్ట్రంగా మారింది. ఒక మిజోరాం మాత్రమే కాదు.. మణిపూర్, త్రిపుర మినహా.. ప్రస్తుత ఈశాన్య రాష్ట్రాలన్నీ అసోం నుంచి వేరుపడ్డవే. 1963లో నాగాలాండ్ ను, 1970లో మేఘాలయను ఏర్పాటు చేశారు. 1972లో అరుణాచల్ ప్రదేశ్, మిజోరాం రాష్ట్రాలను ఏర్పాటయ్యాయి. ఇక, అవశేష రాష్ట్రంగా ప్రస్తుత అసోం మిగిలిపోయింది. అయితే, మిజోరాం, అసోం రాష్ట్రాలు విడిపోయాయి కానీ, బ్రిటీష్ కాలం నాటి సరిహద్దు వివాదం మాత్రం అలాగే కొనసాగుతోంది.

అసోం-మిజోరాం రాష్ట్రాల మధ్య 165 కిలోమీటర్ల మేర సరిహద్దు వుంది. ప్రస్తుత మిజోరాం రాష్ట్రాన్ని ఒకప్పుడు లుషాయ్ హిల్స్ అని పిలిచేవారు. 1857లో అప్పటి బ్రిటీషు ప్రభుత్వం విడుదల చేసిన నోటిఫికేషన్ ప్రకారం.. లుషాయ్ హిల్స్‌ కాచర్ ప్రాంతం నుంచి వేరుపడింది. ఆ తర్వాత 1933లో లుషాయ్ హిల్స్ మణిపూర్‌ల మధ్య ఓ సరిహద్దును నిర్వచిస్తూ మరో నోటిఫికేషన్ ఇచ్చారు. ఈ నోటిఫికేషన్ ప్రకారం.. లుషాయ్ హిల్స్ మరియు అసోంలోని కాచర్ జిల్లాల నుంచి మణిపూర్ సరిహద్దు ప్రారంభమవుతుంది. అయితే, 1875 నోటిఫికేషన్ ప్రకారం సరిహద్దులను గుర్తించాలనేది మిజోరాం వాదన.

బెంగాల్ ఈస్టర్న్ ఫ్రాంటియర్ రెగ్యులేషన్ చట్టం 1873 ఆధారంగా.. 1875 నోటిఫికేషన్ ను రూపొందించారు. BEFR చట్టం ఇన్నర్ లైన్ రెగ్యులేషన్స్ ను నిర్వచించింది. దానినే ఇన్నర్ లైన్ పర్మిట్ సిస్టమ్ అంటారు. దీని ప్రకారం నాడు సరిహద్దులను ఏర్పాటు చేశారు. అయితే, అసోం మాత్రం 1933 నోటిఫికేషన్ లో రూపొందించిన సరిహద్దులను అనుసరిస్తోంది.

148 ఏళ్ల క్రితం నోటిఫై చేసిన.. 1873 BEFR రెగ్యులేషన్ ప్రకారం.. 1,318 చదరపు కిలోమీటర్లు కలిగిన ఇన్నర్ లైన్ రిజర్వ్ ఫారెస్ట్ తమదేనని మిజోరాం వాదిస్తోంది. 1933 నోటిఫికేషన్ ప్రకారం ఆ ప్రాంతం తమ రాష్ట్ర పరిధిలోకే వస్తుందని.. ఆ ప్రాంతాన్ని వదులుకునేది లేదని అసోం చెబుతోంది. అయితే, మిజోరాం మాత్రం ఈ నోటిఫికేషన్ ను తప్పుబడుతోంది. తమను సంప్రదించకుండానే 1933 నోటిఫికేషన్ రూపొందించారనేది మిజోరాం వాదన. ఇలా బ్రిటీష్ కాలంలో వెలువడిన ఈ రెండు నోటిఫికేషన్లే ఇరు రాష్ట్రాల మధ్య గొడవకు కారణమయ్యాయి. ఒక నోటిఫికేషన్ లో ఒకలా.. మరో నోటిఫికేషన్ లో మరోలా సరిహద్దులు నిర్వచించడం వివాదానికి దారితీసింది.

వివిధ గిరిజన తెగలు, వాస్తవికత గురించి తెలుసుకోకుండానే.. అనాలోచితంగా అప్పట్లో బ్రిటిషర్లు ఇష్టం వచ్చిన రీతిలో సరిహద్దులను నిర్ణయించారు. ప్రస్తుత మిజోరాంలో అధికారంలో వున్న కాంగ్రెస్ ప్రభుత్వం కూడా.. అదే రీతిలో ప్రవర్తిస్తోంది. తమ రాష్ట్రానికి చెందిన మిజో జాతి తెగలు కాచర్ హిల్స్ లో నివసిస్తోందని.. అందువల్ల ఆ భూభాగం తమదేనంటూ వాదిస్తోంది.

Related Articles

Leave a Reply

Your email address will not be published. Required fields are marked *

1 × 3 =

Back to top button