NationalistHub - ‘‘అస్థిపంజరాల సరస్సు’’ గుట్టు వీడిందిలా...
Download and install Nationalist Hub Mobile App for instant updates from us.
‘‘అస్థిపంజరాల సరస్సు’’ గుట్టు వీడిందిలా... img



Share via Whatsapp web

అది ఓ రహస్యం. అలాంటి ఇలాంటి రహస్యం కాదు. 1100 ఏళ్లుగా అంతుబట్టకుండా మిగిలిపోయిన మర్మం. హిమాలయ పర్వత శ్రేణుల మధ్యలో చాలా ఏళ్లుగా నిక్షిప్తమైన రహస్యమది. ఒకటి కాదు.. రెండు కాదు.. దాదాపు 600లకుపైగా మనిషి అస్థిపంజరాలను తన కడుపులో దాచుకున్నది ఆ సరస్సు. సుదీర్ఘ కాలంగా శాస్త్రవేత్తలకు సవాలుగా మారిన ఈ అస్థిపంజరాల సరస్సు గుట్టు ఇప్పటికి వీడింది. హిమాలయ పర్వతశ్రేణుల్లో ఉన్న రూప్‌కుంద్‌ సరస్సులోని అస్థిపంజరాల గుట్టువీడింది. జన్యుపరిశోధనల ఆధారంగా ఇవి విభిన్న జాతులకు చెందినవిగా శాస్త్రవేత్తలు గుర్తించారు. భారతీయులతోపాటు మధ్యధరా, ఆగ్నేయాసియా ప్రాంతానికి చెందినవారి అస్థిపంజరాలని హైదరాబాద్‌లోని సెంటర్‌ ఫర్‌ సెల్యూలార్‌ అండ్‌ మాలెక్యులర్‌ బయాలజీ తాజా పరిశోధన నిర్ధారించింది. అస్థిపంజరాల సరస్సుపై ‘‘నేషనలిస్ట్ హబ్’’ స్పెషల్ స్టోరీ...

విశాలమైన హిమాలయ పర్వతాలు.. ఆ పర్వతాల మధ్య ఒక సరస్సు. ఎటుచూసినా ఎముకల గుట్టలు.. పుర్రెల పుట్టలే.. పర్వతారోహకులను ఆకర్షించే అస్థిపంజరాలు. ఆ రహస్యాన్ని ఛేదించేందుకు చాలామంది ప్రయత్నించారు కానీ.. ఎవరి వల్ల కాలేదు. మానవ అస్థిపంజరాల అజ్ఞాత సరస్సు రహస్యం అది.

ఉత్తరాఖండ్‌లోని చమోలీ జిల్లాలో రూప్‌కుండ్ అనే సరస్సు ఉంది. ఇది సముద్రమట్టానికి 16,500 అడుగుల ఎత్తులో, హిమాలయాల్లోని నందాదేవీ పర్వతాల మధ్యలో ఉన్నది. ఈ రూప్‌కుండ్ సరస్సు మానవ అస్థిపంజరాలతో నిండిపోయి ఉంటుంది. అక్కడ ఉన్న అస్థిపంజరాలు చూసినవాళ్లెవరూ కూడా జీవితంలో వాటిని మర్చిపోలేరు. 9వ శతాబ్దానికి సంబంధించిన అస్థిపంజరాలుగా వాటిని గుర్తించారు. ఇవి 1100 ఏళ్ల నాటివి. అవి ఎక్కడి నుంచి వచ్చాయి? ఎలా వచ్చాయి? అసలు అవి ఎవరివి? అనే సందేహాలను శాస్త్రవేత్తలు నివృత్తి చేసినా...వారెలా మరణించారన్నదానిపై మాత్రం స్పష్టత రాలేదు.

రూప్‌కుండ్ అస్థిపంజరాల మిస్టరీపై భిన్న కథనాలు వినిపించాయి. కొంతమంది టిబెట్‌కు చెందిన వ్యాపారుల అస్థిపంజరాలని అన్నారు. మరికొంతమంది యుద్ధ సైనికుల అస్థిపంజరాలని కూడా అన్నారు. ఇంకొంతమంది నందాదేవి దర్శనానికి వచ్చిన భక్తులవని భావించారు. వీటిలో ఏది నిజమో.. ఏది అబద్ధమో నిన్నటిదాకా ఎవరికీ అంతుబట్టలేదు. ఎవరూ ఈ రహస్యాన్ని ఛేదించలేకపోయారు. కానీ ఇవి మాత్రం సైనికులవేనని చెప్పడానికి కొన్ని ఆధారాలున్నాయి. ఈ సరస్సుకు దగ్గరలో కొన్నేండ్ల క్రితం సైనికులు వాడిన ఆయుధాలు, వారి దుస్తులు, ఇతర ఆనవాళ్లు పర్వతారోహకులకు దొరికాయి. చరిత్రకారులు కూడా వారివేనని నిర్ధారించారు. 16 వేల అడుగుల ఎత్తున్న ఈ రూప్‌కుండ్ సరస్సును చేరుకోవడమంటే మామూలు విషయం కాదు. ప్రాణాల మీద ఆశ వదులుకునేవాళ్లు మాత్రమే అక్కడకు వెళ్తారు. వెళ్లే ముందుగా అన్ని జాగ్రత్తలూ తీసుకుంటారు.

1942లో తొలిసారిగా రూప్‌కుండ్ అస్థిపంజరాల సరస్సు గురించి తెలిసింది. బ్రిటిన్‌కు చెందిన ఫారెస్ట్ గార్డ్ రేంజర్ మధ్వాల్ మొట్టమొదటిసారిగా నందాదేవి పర్వతంపై ట్రెక్కింగ్‌కు వచ్చారు. అప్పుడే వీటిని తొలిసారిగా గుర్తించారు. ఆయన ద్వారా ఒకే చోట 600కిపైగా మానవ అస్థిపంజరాలు ఉన్నాయి అనే వార్త ప్రపంచానికి తెలిసింది. ఆ తర్వాత 1957లో ఈ మర్మాన్ని ఛేదించేందుకు ప్రయత్నాలు మొదలయ్యాయి. ఈ అస్థిపంజరాలు ఎవరివి? అవి ఎంత పురాతనమైనవి? సరస్సులోకి ఒకేసారి ఇన్ని అస్థిపంజరాలు ఎలా వచ్చాయి? అనే అంశాన్ని శోధించేందుకు అన్వేషణ మొదలైంది. అందుకోసం 2003, 2004లో ఇండియా, యూరప్ దేశాలకు చెందిన పలు బృందాలు అక్కడకు వెళ్లాయి. అస్థిపంజరాలు 8, 9వ శతాబ్దాల మధ్యకాలానికి చెందినవిగా తేల్చారు. అయితే ఇది పూర్తి స్థాయిలో జరిగిన పరిశోధనలు కాదన్న వాదనలు కూడా వినిపించాయి.

ఒక సరస్సు ఒకేసారి 600 మంది ప్రాణాలను ఎలా బలితీసుకున్నది? అంతమంది ఒకేసారి ఎలా చనిపోయారు? ఇంకేమయినా కారణముందా? కొన్నేండ్లపాటు ఈ అస్థిపంజరాలపై పరిశోధన చేసిన సీసీఎంబీ శాస్త్రవేత్తలు చివరకు ఓ అంచనాకు వచ్చారు. ప్రకృతి వైపరీత్యం వల్లే వీళ్లంతా ప్రాణాలు కోల్పోయి ఉంటారని తేల్చారుఇంతమంది ఈ సరస్సు వద్దకు రావాల్సిన కారణాన్ని, చనిపోయిన పరిస్థ్ధితులను అంచనా వేయలేకపోతున్నారు. దీంతో 1100 ఏండ్ల నాటి రహస్యాన్ని ఇప్పటికి ఛేదించారు శాస్త్రవేత్తలు.

మంచు తుపానే బలితీసుకుందా?

అంతుబట్టని రూప్‌కుండ్ శోధనకు 2013 ఏడాదిలో తెరదించారు పరిశోధకులు. 9వ శతాబ్దంలో భారత్‌కు చెందిన ఒక తెగవాళ్లే మంచు తుఫానులో చనిపోయినట్టు నిర్ధారించారు. అక్కడితో ఆగకుండా మరిన్ని పరిశోధనలు చేయాలని నిర్ణయించారు. 500 అస్థిపంజరాల అవశేషాల నమూనాలను శాస్త్రవేత్తలు సేకరించారు. అంతర్జాతీయ పరిశోధన సంస్థలతో కలిసి సీసీఎంబీ వీటిపై పదేళ్లుగా పరిశోధనలు చేసింది. వేల ఏళ్ల క్రితం అవశేషాలు కావడంతో ‘ఏన్షియంట్‌ డీఎన్‌ఏ క్లీన్‌ ల్యాబ్‌’లో 72 ఎముకల నమూనాలను విశ్లేషించగా.. ఆసక్తికర విషయాలు బయటపడ్డాయి. సగం భారతీయులవిగా కాగా మరో సగం మధ్యధరా, గ్రీస్‌, క్రిటా జాతులకు చెందినవిగా వెల్లడైంది. వాళ్ల పుర్రెలపై ఉన్న గుర్తుల ఆధారంగా వారిని గుర్తించారు. ఇటీవల రూప్‌కుండ్ సరస్సులో అస్థిపంజరాలు మాయమవుతున్నాయి. వందల ఏండ్ల్లనాటి ఈ అస్థిపంజరాలను ఎవరు తీసుకెళ్తున్నారు? ఎందుకు తీసుకెళ్తున్నారు? వాటితో ఏం చేస్తున్నారు? తాంత్రికమైన పనులకోసం వాటిని చోరీ చేస్తున్నారా? లేదా ఇంకేదైనా కారణముందా? అనేది తెలియరాలేదు. చాలాకాలం క్రితమే ఉత్తరాఖండ్ సర్కార్ కూడా అస్థిపంజరాలు మాయమవుతున్నాయన్న విషయాన్ని ధ్రువీకరించింది. గతంలో 600లకుపైగా ఉన్న వాటిలో.. ఇప్పుడు మొత్తం కలిపి 200ల అస్థిపంజరాలు మాత్రమే ఉన్నాయని చెబుతున్నారు. ....