సినీ నటి, మాజీ ఎంపీ జయప్రదకు జైలు శిక్ష విధించారు. ఆరు మాసాల జైలు శిక్షను విధిస్తున్నట్లు కోర్టు తెలిపింది. జయప్రదతో పాటు మరో ముగ్గురికి కూడా చెన్నైలోని ఎగ్మోర్ కోర్టు జైలు శిక్ష విధించింది. అంతేకాకుండా 5000 రూపాయల జరిమానాను విధిస్తున్నట్లు తెలిపింది. చెన్నైలోని రాయపేటలో జయప్రదకు ఓ సినిమా థియేటర్ ఉంది. చెన్నైకి చెందిన రామ్ కుమార్, రాజబాబుతో కలిసి అన్నారోడ్డులో సినిమా థియేటర్ ను నడిపించారు. సినిమా థియేటర్ లో పనిచేస్తున్న కార్మికుల నుండి వసూలు చేసిన ఈఎస్ఐ మొత్తాన్ని చెల్లించలేదు. దీంతో ఎగ్మోర్ కోర్టును ఆశ్రయించారు కార్మికులు. అయితే ఈ పిటిషన్ ను కొట్టివేయాలని జయప్రద దాఖలు చేసిన పిటిషన్లను హైకోర్టు కొట్టివేసింది. ఎగ్మోర్ కోర్టు జయప్రదతో పాటు మరో ముగ్గురికి ఆరు నెలల జైలు శిక్షను విధించింది. కార్మికులకు అందాల్సిన మొత్తాన్ని చెల్లిస్తానని జయప్రద చెప్పినా.. లేబర్ గవర్నమెంట్ ఇన్సూరెన్స్ కార్పొరేషన్ న్యాయవాది అభ్యంతరం తెలిపారు. ఇరుపక్షాల వాదనలు విన్న న్యాయస్థానం జయప్రద సహా ముగ్గురికి ఆరు నెలల జైలుశిక్ష, 5 వేల జరిమానా విధిస్తూ తీర్పునిచ్చింది.
నటి జయప్రద 70, 80 లలో భారతీయ చలనచిత్ర రంగంలో ఓ స్టార్ హీరోయిన్. తమిళ, కన్నడ, తెలుగు హిందీ భాషల్లో తనదైన నటనతో అభిమానులను అలరించారు. ఆమె రాజకీయాల్లో కూడా తనదైన ముద్ర వేశారు. సమాజ్ వాదీ పార్టీలో చేరి పార్లమెంట్ ఎన్నికల్లో రాంపూర్ నియోజకవర్గం నుంచి పోటీ చేసి గెలిచి ఎంపీ అయ్యారు. సినీ, రాజకీయ రంగాల్లో చురుగ్గా పాల్గొన్న ఆమెకు చెన్నైలోని రాయపేటలో థియేటర్‌ను నడిపారు. మొదట్లో థియేటర్ కు ఆదరణ లభించినా.. ఆ తర్వాత ఆదాయం బాగా తగ్గడం మొదలైంది. ఇక ఆస్తి వివాదాలు కూడా చుట్టముట్టడంతో థియేటర్‌ను మూసివేశారు.
