National

మాతా అన్నపూర్ణ విగ్రహానికి ప్రాణ ప్రతిష్ట నిర్వహించిన యోగి ఆదిత్యనాథ్

నవంబరు 11న ఢిల్లీ నుండి కాశీకి బయలుదేరిన 18వ శతాబ్దపు మా అన్నపూర్ణ విగ్రహాన్ని నవంబర్ 15, సోమవారం నాడు కాశీ విశ్వనాథ ఆలయ ప్రాంగణంలో కొత్తగా నిర్మించిన అన్నపూర్ణ ఆలయంలో ప్రతిష్టించారు. ఉత్తరప్రదేశ్ ముఖ్యమంత్రి యోగి ఆదిత్యనాథ్ మాతా అన్నపూర్ణ విగ్రహానికి ప్రాణ ప్రతిష్ట కార్యక్రమానికి హాజరయ్యారు. ఈ విగ్రహం ఉత్తరప్రదేశ్ రాష్ట్రవ్యాప్తంగా నాలుగు రోజుల పాటు 18 జిల్లాల గుండా ప్రయాణించి, నవంబర్ 14 ఆదివారం అర్ధరాత్రి దాటిన తర్వాత వారణాసికి చేరుకుంది. సోమవారం నాడు ఘనంగా కార్యక్రమాన్ని నిర్వహించి ప్రాణ ప్రతిష్ట చేశారు.

108 సంవత్సరాల తరువాత, అన్నపూర్ణ మాత విగ్రహం మరోసారి కాశీకి తిరిగి వచ్చింది. ఆ ఘనత కాశీ ఎంపీకి, ప్రధాని నరేంద్ర మోదీకి దక్కుతుంది. కాశీలో, రాష్ట్రంలోని ప్రతి ఒక్కరి తరపున వారికి హృదయపూర్వక కృతజ్ఞతలు తెలియజేస్తున్నాను అని దేవతా ప్రతిష్ఠాపన కార్యక్రమం అనంతరం సీఎం యోగి ఆదిత్యనాథ్ అన్నారు. ఆచార వ్యవహారాలను పాటించి పండితుల సమక్షంలో ప్రాణ ప్రతిష్ట కార్యక్రమాన్ని నిర్వహించారు.

ఉత్తర ప్రదేశ్ ముఖ్యమంత్రి యోగి ఆదిత్యనాథ్ రెండు రోజుల పర్యటన నిమిత్తం ఆదివారం రాత్రి వారణాసి చేరుకున్నారు. ఆలయంలో పూజలు చేసిన అనంతరం ఆదిత్యనాథ్ కాశీ విశ్వనాథ ఆలయ ప్రాంగణం పునర్నిర్మాణ పనుల పురోగతిని కూడా పరిశీలించారు. డివిజనల్ కమీషనర్ దీపక్ అగర్వాల్ మాట్లాడుతూ, “వాస్తు శాస్త్రం ప్రకారం ఈశాన్య మూలలో ఒక ఆలయం నిర్మించబడింది మరియు మందిరం కాశీ విశ్వనాథ్ ధామ్ ఉత్తర ప్రవేశ ద్వారం ప్రక్కనే ఉంది” అని తెలిపారు. అన్నపూర్ణ విగ్రహంతో పాటు ఆలయ ప్రాంగణంలో పునర్నిర్మాణ పనుల నిమిత్తం తొలగించిన మరో ఐదు విగ్రహాలను కూడా సోమవారం నాడు ప్రతిష్ఠించారు. 18వ శతాబ్దానికి చెందిన మా అన్నపూర్ణ విగ్రహం 100 సంవత్సరాల క్రితం వారణాసి నుండి దొంగిలించబడింది మరియు తరువాత కెనడాలోని మ్యూజియంలో కనుగొనబడింది.

గురువారం దేశ రాజధానిలో జరిగిన కార్యక్రమంలో భక్తుల హర్షధ్వానాల మధ్య విగ్రహాన్ని ఉత్తరప్రదేశ్ ప్రభుత్వానికి అందజేశారు. యోగి ఆదిత్యనాథ్ ప్రభుత్వంలో మంత్రిగా ఉన్న సురేష్ రాణాకు కేంద్ర సాంస్కృతిక మరియు పర్యాటక శాఖ మంత్రి జి కిషన్ రెడ్డి విగ్రహాన్ని బహూకరించారు. ఈ కార్యక్రమంలో కేంద్ర కేబినెట్‌లోని మహిళా శిశు అభివృద్ధి శాఖ మంత్రి స్మృతి ఇరానీ, విదేశాంగ శాఖ సహాయ మంత్రి మీనాక్షి కూడా పాల్గొన్నారు.

Related Articles

Back to top button